11 аж ахуйн нэгжийн 5,720 тонн махыг БНХАУ руу экспортолно

• Aug 30, 2022

Монгол Улсын Засгийн газрын 2022 оны наймдугаар сарын 24-ний өдрийн хуралдаанаар Мэргэжлийн байгууллагын хяналт шалгалтын дүнгээр мах, махан бүтээгдэхүүний эрүүл ахуй, чанар, аюулгүй байдлын стандартын шаардлага хангасан дулааны аргаар боловсруулсан махыг БНХАУ-д экспортлох ажлыг зохион байгуулах чиглэл өгсөн.

Энэхүү шийдвэртэй холбогдуулан ХХААХҮЯ, Гаалийн ерөнхий газар, Мэргэжлийн хяналтын байгууллагаас нэр бүхий 11 аж ахуйн нэгжийн бэлтгэсэн, итгэмжлэгдсэн лабораторийн шинжилгээний дүнгээр шаардлага хангасан 5,720.6 тонн махыг экспортод гаргах бэлтгэл ажилд хяналт тавин ажиллаж байгааг мэдээллээ.

ХХААХҮЯ экспортлогч аж ахуйн нэгжийн төлөөлөлтэй наймдугаар сарын 26-нд уулзан, мэдээлэл зөвлөмж өглөө.

Мах экспортлогч аж ахуйн нэгжүүдэд дараах зүйлсийг анхааруулав. Үүнд:

-Ажлын байр, агуулахын цэвэрлэгээ, халдваргүйтгэлийг тогтмол хийх,

-Мах, махан бүтээгдэхүүнийг хадгалахдаа стандартын дагуу зориулалтын поддон тавиурт хурааж хэвших,

-Хадгалах, хөлдөөх камерын температурыг тогтмол хянах,

-Хүнсний түүхий эд бүтээгдэхүүний ул мөрийг мөрдөн тогтоох,

-Лабораторийн шинжилгээний хариу болон баримт бичгийг хадгалж архивлах, бүртгэл хөтлөх

-Ажилчдыг эрүүл мэндийн үзлэг шинжилгээнд зургаан сар тутам хамруулах,

-Хүнсний тухай, Хүнсний бүтээгдэхүүний аюулгүй байдлыг хангах тухай хуулиуд болон тэдгээрт нийцүүлэн гарсан холбогдох дүрэм, журам, стандарт, Засгийн газрын 311 дүгээр тогтоолоор батлагдсан дотоод хяналтыг мөрдөж ажиллах.

Эх сурвалж: ХХААХҮЯ